OORSPRONG EN AARD VAN DIE MATERIAAL

Vir die Junior Primêre fase word onderrighulpmiddels saam met die boeke verskaf. Kinders word aangespoor om nuwe kennis en vaardighede self te ontdek deur uitstappies te onderneem, verrykende nalees uit naslaanbronne te doen asook die ondersoek van fasette vanuit die werklike leefwêreld. Tog word die voordele van gestruktureerde onderrig deur die benutting van doelontwikkelde onderrigmateriaal (handboeke) ook behou. Dit sluit in vinnige effektiewe leer deur ordelike en sistematiese ontsluiting van kennis. Betekenisvol meer werk kan op dié wyse in ‘n jaar afgehandel word.

Afrikaans as eerste taal geniet besondere aandag. Prosa word gekies uit die keur van behoudende Afrikaanse werke. Voorgeskrewe werke wat Christelike norme en standaarde en ‘n Bybelse lewens- en wêreldbeskouing vaslê geniet voorkeur. Geskiedenis is van kardinale belang en daarom word die geskiedenis van die Afrikanervolk onderrig deur gebruik te maak van die handboeke van skrywers met 'n eie kultuursentiment. Vir natuur- en skeikunde word mini chemie en fisika laboratoriumstelle, wat spesiaal vir die leerplan gepak is, addisioneel verskaf.

‘n Wye spektrum van laer- en hoërskoolvakke/ -leerareas word aangebied. Daar word toegesien dat die regte hoeveelheid vakke geneem en die regte akademiese standaard gehandhaaf word.